Hans Christian Lyngbye (1782-1837)

H. C. Lyngbye (1782-1837) varð borin í heim í Aalborg í 1782. Hann las náttúrufrøði og gudfrøði og tók embætisprógv í 1812. Lyngbye arbeiddi saman við plantufrøðinginum Niels Hofman Bang, ið vakti hansara áhuga fyri algum og tara. Í 1819 vann Lyngbye eina kapping á Universitetinum í Keypmannahavn. Tí hendi tað at professari í plantufrøði við Universitetið, J. W. Hornemann, rindaði fyri útgávu Lyngbyes um tara, „Tentamen Hydrophytologiæ Danica“. Verkið lýsir nágreiniliga 321 tarasløg við myndum av 70, harímillum 7 nýggjar ættir og 50 nýggj sløg, og tað gav okkum meiri vitan um algufloruna í Danmark, Noregi, Føroyum og Grønlandi.
Í 1817 vitjaði Lyngbye í Føroyum og skrivaði eina ritgerð um grindahval og hvalaveiðu. Hann var eisini áhugaður í gomlum føroyskum ævintýrum og kvæðum og savnaði tey, hann lærdi seg føroyskt fyri at at skriva tey niður. Frá 1819 arbeiddi hann sum prestur í Danmark og helt fram við síni taragransking. Í 1836 skrivaði Lyngbye eina doktararitgerð, men hon varð gloymd í lummanum hjá einum boðbera og varð ikki latin inn til tíðina á Universitetinum í Keypmannahavn. Lyngbye andaðist árið eftir. Plantufrøðiligi parturin av ritgerð hansara varð útgivin í 1879. Ættin av blágrønubakteriu „Lyngbya“ er nevnd eftir honum.